Нұр-Сұлтан 19.7°
×
26.11.2021, 09:50
Қызық па? Жаңалықты достарыңызбен бөлісіңіз!

Теннис: Қазақстандықтар Азия командалық біріншілігінің финалына шықты

Ұлттық құрама өкілдері «Дәулет» теннис орталығында 12 жасқа дейінгілер арасында өтіп жатқан Азия командалық біріншілігінің (ITF Asian 12&Under Team Championships 2021) финалына шықты, деп хабарлады Elorda.Info.

Теннис: Қазақстандықтар Азия командалық біріншілігінің финалына шықты

Қазақстан теннис федерациясы мәлім еткеніндей, еліміздің қос құрамасы алғаш рет финалға қатар шығып отыр. Соңғы үш жылда қазақстандық ұлдар қола жүлдені қанағат тұтқан еді. Бұл жолы Өзбекстанмен өткен жартылай финалдық матчта қазақстандықтар жеңіске деген жігерлерін таныта білді. Командаға алғашқы ұпайды Родион Трайгель салды. Ол үш сетке созылған бәсекеде Алан Зинатулинді ұтты – 6:1, 1:6, 6:1. Нұр-Сұлтан ұлттық теннис орталығының түлегі Ярослав Пшеничныйдың Акмаль Абдуллаевпен кездесуі де тартысты өтті. Бірінші партияда брейк жасаған Ярослав сол басымдылығынан айырылған жоқ. Ол екінші сетте де есеп 6:5 болған мезетте шешуші брейкті жасай білді – 7:5.

Жұптық матч ешқандай рөл ойнамағандықтан, қазақстандықтар күштерін сақтау үшін кортқа шыққан жоқ. Қазақстандық ұлдар финалда Пәкстан құрамасымен бас жүлдені сарапқа салады. Оларды топтық бәсекеде 2:1 есебімен ұтқан болатын.

Қазақстандық қыздар өз тарихында екінші рет Азия командалық біріншілігінің финалына шықты. Жартылай финалда қыздар Өзбекстан құрамасынан 3:0 есебімен басым түсті. Эвелина Балаганская Кира Кимді 6:1, 6:3 есебімен жеңсе, Ева Корышева Эмилия Кимді қапы қалдырды – 6:1, 6:0. Жұптық сында да олар қарсылас шыдатқан жоқ.

Финалда қазақстандық қыздар Үндістанмен сынға түседі. Топтық бәсекеде отандастарымыз бұл қарсыласты 2:1 есебімен жеңген болатын. Қыздар 2019 жылғы чемпиондық атағын қорғайтын болады.

Ең өзекті жаңалықтарды біздің Telegram арнамыздан және Facebook-тегі парақшамыздан қараңыз
Ақпарат ағыны

Елорда үздіктері