Нұр-Сұлтан 18.6°
×
09.11.2021, 10:30
Қызық па? Жаңалықты достарыңызбен бөлісіңіз!

Дэвис кубогының финалына қатысатын Қазақстан құрамасы анықталды

Испания астанасы Мадридте өтетін Дэвис кубогы финалына қатысатын Қазақстан құрамасы анықталды, деп хабарлады Elorda.info ҚТФ баспасөз қызметіне сілтеме жасап.

Дэвис кубогының финалына қатысатын Қазақстан құрамасы анықталды

Юрий Щукин бастаған бапкерлік құрам шешуші бәсекеде мына ойыншыларға сенім артты. Александр Бублик (әлемнің 34-ракеткасы), Михаил Кукушкин (159-орын), Дмитрий Попко (162-орын), Андрей Голубев (жұптық сында 35-орын), Александр Недовесов (жұптық сында 76-орын).

Қазақстан құрамасы В тобында Канада және Швеция теннисшілерімен сынға түседі.

27 қараша күні Қазақстан мен Швеция матчы өтеді. Келесі күні қазақстандықтар 2019 жылы Дэвис кубогының финалына дейін жеткен Канада құрамасымен кортқа шығады.

Дэвис кубогының финалдық матчтары алғаш рет Инсбрук, Мадрид және Турин қалаларында бір мезгілде өтеді. Жарыста алты топқа бөлінген 18 команда бақ сынайды. Әр топтың жеңімпаздары мен екінші орын алғандар ішінен екі үздік құрама ширек финалға жолдама алады. Жартылай финалға өткендер жүлделі орындарға таласумен бірге 2022 жылдың финалдық кезеңіне қатысу құқығына да ие болады.

Дэвис кубогы 1900 жылдан бері жыл сайын өткізіліп келеді. Жеңістер жөнінен АҚШ құрамасы (32) алда тұр. Ал осыған дейінгі додада испаниялықтар үздік шыққан болатын.

Ең өзекті жаңалықтарды біздің Telegram арнамыздан және Facebook-тегі парақшамыздан қараңыз
Ақпарат ағыны

Елорда үздіктері