Нұр-Сұлтан 22.1°
×
01.07.2022, 13:16
Қызық па? Жаңалықты достарыңызбен бөлісіңіз!

Еліміздің үздік чемпиондары елордалық оқушыларға шеберлік сабақтарын өткізді

Бүгін Нұр-Сұлтан қаласының әл-Фараби атындағы Оқушылар сарайы филиалының «Білім парк» өнер-білім орталығында еліміздің мақтан тұтар чемпиондары балалармен кездесу өткізді, деп хабарлады Elorda.info.

Еліміздің үздік чемпиондары елордалық оқушыларға шеберлік сабақтарын өткізді
Фото: Сұлтан Сейітов

Кездесуге Нұр-Сұлтан қаласының Білім басқармасы басшысының орынбасары Римма Иманғазинова, бокстан әлем чемпионы Санжар Тәшкенбай, ММА бойынша әлем чемпионы Жасұлан Әкімжан, шахматтан әлем чемпионы Сауат Нұрғалиев, көркем гимнастикадан Азия чемпионы Сабина Бақатова және Оқушылар сарайының балалары қатысты.

Балалар жылы аясында Нұр-Сұлтан қаласында алғаш рет бүгінгі «Балалар мен чемпиондар» жобасын іске қостық. Мұнда балалардың дамуы үшін қажетті шахмат, бокс, көркем гимнастика сияқты спорт түрлерінен үйірмелер мен шеберлік сабақтарын ұйымдастырдық. Балалар жазғы демалысын, бос уақытын тиімді өткізсін деген ниетпен осы жобаны қолға алдық. Аталған іс-шараның мақсаты – өскелең ұрпақты дене шынықтырумен айналысуға, салауатты өмір салтын қалыптастыруға шақыру, спортты насихаттау, - деді қалалық Білім басқармасы басшысының орынбасары Римма Иманғазинова.  

Спортшылар орталықтың жұмысымен, осы жердегі оқушыларға ашылған мүмкіндіктермен танысты.

Осы білім орталығына келіп қуанып отырмын. Спорт секциялары көбейген сайын, болашақ ұрпақтарымызға үлкен жол ашады. Бокс елімізде алдыңғы қатарда тұрған спорт түрі. Болашағы зор. Қазақ жігіттері әлемдік рингтерге шығып, мықтылықтарын дәлелдеген. Маған балалардың бүгінгі талпыныстары ұнайды. Олардың әлемді бағындыратынына сенімдімін. Олар жазғы уақыттарын тиімді өткізіп жатыр. Әлемдік деңгейдегі жекпе-жекке шығу үшін талпыныс, еңбек қажет,- деді ММА бойынша әлем чемпионы Жасұлан Әкімжан.

Бокстан әлем чемпионы Тәшкенбай Санжар, ММА бойынша әлем чемпионы Жасұлан Әкімжан, шахматтан әлем чемпионы Сауат Нұрғалиев, көркем гимнастикадан Азия чемпионы Сабина Бақатова балаларға арнап өздерінің шеберлік сабақтарын өткізді. Шеберлік сабақтары балаларға спорт шеберлерінің өз спорт түрлеріндегі ерекше әдіс-тәсілдерімен танысуға мүмкіндік берді. Балалардың бұл сабақтан алған әсерлері де ерекше.

Маған бүгінгі шеберлік сабағы өте қатты ұнады. Бокспен айналысып жүргеніме бір жыл болды. Чемпиондармен кездесуде олардың жұдырықтасу тәсілдерін үйрендім. Олар қарсыластың соққысынан қалай қорғану қажет екенін де көрсетті. Болашақта мен де солар сияқты чемпион болғым келеді, - деді Нұрислам Мырзақұл.

Шеберлік сабақтардан соң спортшылар мен балалардың сұхбаттасуы үшін кездесу ұйымдастырылды. Сұхбат барысында оқушылар чемпиондардың жетістікке жету жолындағы кедергілер мен оларды жеңу жолдары, ел үшін додаға түскен уақыттағы эмоциялары мен жауапкершілік туралы және тағы басқа өздерін қызықтыратын сауалдарын қойды.

Кездесу соңында балалар өздерінің сүйікті спортшыларынан қолтаңба алып, суретке түсті.

Ең өзекті жаңалықтарды біздің Telegram арнамыздан және Facebook-тегі парақшамыздан қараңыз
Ақпарат ағыны

Елорда үздіктері