Нұр-Сұлтан
17.11.2021, 09:20
Elorda Aqparat
Elorda Aqparat
Қызық па? Жаңалықты достарыңызбен бөлісіңіз!
Мақалада:

Өңірлерге көмір жеткізу көлемі 487 мың тоннаға ұлғайтылады

Индустрия және инфрақұрылымдық даму министрлігінде әкімдіктердің, көмір өндіруші компаниялардың және «Қазақстан темір жолы» ҰК» АҚ өкілдерінің қатысуымен кеңейтілген кеңес өткізіліп, халықты көмірмен қамту мәселелері қарастырылды, деп хабарлады Elorda.Info.

Өңірлерге көмір жеткізу көлемі 487 мың тоннаға ұлғайтылады

Жауапты ведомствоның деректеріне сәйкес биыл қаңтар-қазан аралығында елімізде 88 млн тоннаға жуық көмір өндірілген. Бұл былтырғы деңгейден 100,2% жоғары.

«Энергия өндіруші кәсіпорындарға шамамен 48 млн тонна, өнеркәсіптік кәсіпорындарға 5 млн тонна, коммуналдық-тұрмыстық қажеттіліктерге және халыққа 7,6 млн тоннадан астам көмір тиелді. «Қазақстан темір жолы» ҰҚ» АҚ өңірлерге көмірді жеткізу жоспары басым негізде орындалатынын және көмір кеніштерінен түсетін өтінімдер ұлғайса, қажеттілікті ашық вагондармен қамтамасыз етуге өзінің дайын екенін растады», - делінген министрліктің ақпаратында.

Қараша айында өңірлерге көмір жеткізу көлемі 487 мың тоннаға ұлғайтылмақ. Халық арасында үлкен сұранысқа ие Шұбаркөл көмірінің 240 вагоны өңірлерге күн сайын қосымша жөнелтіледі. Министрлік өкілдерінің айтуынша, көмір кәсіпорындары қатты отынның қажетті көлемін өндіруге, ал теміржолшылар көмірді уақтылы жеткізуге жауапты.

Жергілікті атқарушы органдар тұтыну көлемін нақты жоспарлауға, көмір сатып алуды уақытында жүргізуге, сондай-ақ оның өңірдегі және барлық қорын бақылауда ұстауы тиіс. Баға мониторингін жүргізу және қатты отын құнын көтеру жағдайларын анықтау – құзыретті уәкілетті органдардың міндеті.

Жиын соңында тиісті ведомство көмір бағасының өсуіне жол бермеу мақсатында Тау-кен өндіру және тау-кен металлургия кәсіпорындарының қауымдастығымен меморандумға қол қойды.

Ресми статистикаға сәйкес кеніштерден көмірді жіберу бағасы Қарағанды облысында тоннасына – 7 093 теңге, Павлодар облысында – 3 375 теңге, сондай-ақ тұтастай елімізде – 5 600 теңге.

Ең өзекті жаңалықтарды біздің Telegram арнамыздан және Facebook-тегі парақшамыздан қараңыз
Ақпарат ағыны

Елорда ержүректері